Reykjavík skynjuð á nýjan og framandi hátt

Í sumar hafa menningarstofnanir Reykjavíkurborgar staðið fyrir kvöldgöngum frá Kvosinni þriðja sumarið í röð. Í kvöld kl. 20 mun Ilmur Stefánsdóttir myndlistarkona fara fyrir göngunni og varpa nýju ljósi á miðbæ Reykjavíkur á leiðinni. Ilmur er kunn fyrir að fara óhefðbundnar leiðir í því sem hún tekur sér fyrir hendur og það gerir hún einnig í þessari áttundu Kvosargöngu sumarsins.

Með ýmsum brellum og brögðum mun Ilmur hjálpa göngufólki að skoða og skynja borgina á nýjan og framandi hátt. Skynfærin verða virkjuð sem aldrei fyrr, svo upplifunin verður í senn óvænt og ánæjuleg. Gangan hefst kl. 20 og tekur um klukkustund. Lagt er af stað úr Grófinni, milli Tryggvagötu 15 og 17 og er þátttaka ókeypis.