The Bridge - þrjár stjörnur

Heimildarmyndin The Bridge fjallar um sjálfsvíg á Golden Gate-brúnni við San Fransisco. Brúin er sá staður í heiminum þar sem flestir binda enda á líf sitt. Á um það bil tveggja vikna fresti stekkur einhver fram af brúnni út í nær öruggan dauða.

Leikstjórinn Eric Steel var við brúna í heilt ár frá sólarupprás til sólseturs og tók myndir af þeim sem fóru um brúna. Á þeim tíma festi hann 23 sjálfsvíg á filmu, þrátt fyrir að hafa alltaf tilkynnt brúaryfirvöldum þegar hann sá einhvern líklegan til að stökkva.

Í myndinni er talað við vitni af brúnni, fjölskyldur og vini þeirra sem stökkva. Reynt er að komast að því hvað fái fólk til að gera þetta og einnig eru sýnd áhrif sjálfsvíganna á alla aðstandendur.

Myndefnið frá brúnni er óhugnanlega fallegt. Náttúrufegurðin og þetta magnaða mannvirki skapa svo skýra andstæðu við kaldan raunveruleika sjálfsvíganna. Myndinni tekst merkilega vel að fjalla um þetta viðkvæma efni á heiðarlegan en fallegan máta. Það er hvorki gerð tilraun til að fegra né sverta viðfangsefnið. Hún gefur engin einföld svör en vekur þeim mun fleiri spurningar.

Helsti gallinn við hana er bláendirinn. Þar er eins og leikstjórinn missi traustið á efninu í smástund og hæfileika áhorfenda til að skilja fína drætti og finnist hann þurfa að ljúka myndinni á smásparki í sköflunginn, svona til að undirstrika mál sitt. Í heildina er þetta samt áhrifamikil og mjög vel gerð mynd sem skilur engan eftir ósnortinn.