Mál Jónasar fyrir Hæsta­rétti í morgun

Mál Jónasar Garðarssonar, fyrrverandi formanns Sjómannafélags Reykjavíkur, var tekið fyrir í Hæstarétti í morgun. Jónas var í byrjun júní á síðasta ári dæmdur í þriggja ára óskilorðsbundið fangelsi fyrir manndráp af gáleysi.

Tvennt lét lífið þegar Harpa, skemmtibátur Jónasar, steytti á Skarfaskeri haustið 2005. Jónas hélt því fram við aðalmeðferð málsins fyrir Héraðsdómi Reykjavíkur að hann hefði ekki verið við stýrið þegar slysið varð heldur Matthildur Harðardóttir. Matthildur og sambýlismaður hennar, Friðrik Ásgeir Hermannsson, létust í slysinu. Tíu ára sonur Jónasar slapp ómeiddur en Jónas og kona hans slösuðust nokkuð.

Jónas hlaut einn þyngsta dóm sem kveðinn hefur verið upp hér á landi fyrir manndráp af gáleysi og var dæmdur í þriggja ára fangelsi. Dómurinn tók ekki mark á vitnisburði Jónasar og taldi hann hafa gert sig sekan um að reyna að koma ábyrgð yfir á þá sem létust í sjóslysinu. Dómurinn taldi einnig að Matthildur hefði lifað af slysið hefði Jónas brugðist við með eðlilegum hætti. En á meðan hún var neðan þilja að huga að sambýlismanni sínum stýrði Jónast bátnum af skerinu frá landi. Jónas var undir áhrifum áfengis þegar slysið varð.

Jónas sagði sig eftir að dómurinn var kveðinn upp frá öllum trúnaðarstörfum sem hann hefur gegnt fyrir Sjómannafélagið, Sjómannasamband Íslands og Norræna flutningamannasambandið.

Jónas krefst sýknu en ákæruvaldið mun fara fram á þyngri dóm yfir Jónasi en þeim sem hann fékk í Héraðsdómi Reykjavíkur.