Tjónið á Sel­tjarnar­nesi hlaupi lík­lega á milljónum

„Þetta mál er til rannsóknar hjá okkur núna og verið er að vinna hörðum höndum að því að upplýsa það.“

Ásmundur segir lögreglu ekki vita hvort einn eða fleiri hafi verið að verki en hann biðlar til fólks að athuga hvort það eigi myndbandsupptökur úr bílum eða heimilum sem gætu varpað ljósi á málið og koma þeim til lögreglu. Hann segir tjónið líklega hlaupa á einhverjum milljónum.

Ekki langt síðan lögregla rannsakaði rispur á bílum

Hann segir álíka mál hafa komið upp áður og það sé ekki langt síðan lögregla glímdi við eignaspjöll í Vesturbæ þar sem bílar voru rispaðir.

Rætt var í morgun á Vísi við Magnús Benediktsson, forseta bæjarstjórnar á Seltjarnarnesi, og eiginkonu hans Hildi Sif Hilmarsdóttur sem vöknuðu í morgun við skilaboð frá nágranna sínum um að búið væri að brjóta rúður á bílum við heimili þeirra.

„Ég stekk út á sloppnum og kíki á þetta og þá sjáum við að það er búið að brjóta rúður á nokkrum bílum. Svo kemur í ljós þegar fleiri nágrannar fara út að tjónið er töluvert umfangsmeira. Þetta eru hátt undir þrjátíu bílar sem urðu fyrir barðinu,“ sagði Magnús í samtali við fréttastofu.