Fullt hús hjá Stúdentaleikhúsinu

„Um fjörutíu manns sóttu um að komast inn í Stúdentaleikhúsið í ár," segir Halldóra Rut Bjarnadóttir, einn af stjórnendum leikhússins, sem sýnir nú leikverkið Scarta undir stjórn Víkings Krist­jánssonar. „Víkingur lagði fram hugmynd að handriti, valdi þá sem honum fannst passa í hlutverkin og í kjölfarið hófst átta vikna spunaferli þar sem verkið var sniðið í samvinnu við leikara og listræna stjórnendur," útskýrir Halldóra, en Scarta var frumsýnt fyrir rúmri viku og hlaut góðar viðtökur.

„Þetta er svolítið öðruvísi sýning þar sem nálægð áhorfenda og leikara er meiri en vanalega og áhorfendur geta verið viðbúnir því að óvæntir hlutir eigi sér stað," bætir hún við. Í haust fagnar Stúdentaleikhúsið áttatíu ára starfsafmæli sínu og segir Halldóra starf leikhússins gegna mikilvægu hlutverki í íslensku leiklistarlífi. „Þetta er svolítill stökkpallur fyrir unga og efnilega leikara inn í Leiklistarskólann, en ár hvert hafa margir af þeim sem komast þar inn verið í Stúdentaleikhúsinu."

Halldóra hefur staðið í ströngu við uppsetningu Scarta að undanförnu. „Það var uppselt á fyrstu tvær sýningarnar og aðeins örfá sæti eru laus á þær næstu. Miðinn kostar aðeins 1.000 krónur fyrir nema og 1.500 fyrir almenning, svo það er um að gera að skella sér ódýrt í leikhús í kreppunni," segir Halldóra. Upplýsingar um sýningar og miðasölu má finna á www.studentaleikhusid.is