Arnaldur beint á toppinn með Myrká

Væntanlega kemur það engum á óvart að nýjasta bók Arnaldar Indriðasonar, Myrká, skuli hafa hrifsað efsta sæti metsölulista Pennans sem birtur var í gær. Myrká fór í sölu fyrir aðeins fimm dögum og náði því efsta sætinu á fjórum dögum.

Það sem gerir árangur Arnaldar enn merkilegri er að salan skuli hafa aukist um átta prósent á milli ára; eitthvað sem menn töldu nánast ógjörning miðað við það æði sem reið yfir þegar Harðskafi kom út. „Þetta er náttúrlega bara fjarstæðukennt," segir kampakátur Egill Jóhannsson hjá Forlaginu, útgefanda Arnaldar, þegar þessar tölur eru bornar undir hann. „Á fjórum dögum fer hann í fyrsta sætið og eykur söluna á milli ára um átta prósent. Þetta fer langt fram úr okkar væntingarvísitölu," heldur Egill áfram.

Hann þorir þó ekkert að segja til um framhaldið næstu daga, hvort að bókin haldi þar að segja þessum ótrúlega dampi. En segir söluna vissulega gefa góð fyrirheit um að jólin í ár verði meiri bókajól en undanfarin ár. „Annars er ómögulegt að spá fyrir um þetta. Þetta gefur okkur von um að bókin verði sterkari en undanfarin ár. Ef okkur tekst að halda henni í þessu horfi þá verður það mikill sigur fyrir okkur."