Real Madrid féll úr bikarnum gegn liði í 3. deild

Real Union, sem leikur í 3. deild spænska boltans, náði í kvöld því afreki að slá stórlið Real Madrid út úr Konungsbikarnum. Tvær viðureignir þessara liða enduðu samtals með jafntefli 6-6 en Real Union fer áfram á fleiri mörkum á útivelli.

Union vann fyrri leikinn í 32-liða úrslitum keppninnar 3-2. Seinni leikurinn fór fram í kvöld og stefndi allt í að Real Madrid færi áfram enda staðan 4-2 þeim í vil þegar venjulegur leiktími var að líða.

En þá náði Real Union að koma boltanum framhjá Jerzy Dudek og minnka muninn í 4-3. Þrátt fyrir að tapa leiknum í kvöld komst Real Union hinsvegar áfram en þessi úrslit verða að teljast ansi óvænt.

Raul skoraði þrennu fyrir Real Madrid í leiknum í kvöld en þau mörk telja nú lítið.