Fimm skáld í Land Cruiser Þorgríms

„Nei, nei, það var engin spenna okkar á milli. Þetta er nú allt fólk sem þekkist vel og veit sem er að við stjórnum litlu hvað þessar tilnefningar varðar," segir Einar Kárason rithöfundur.

Einar er spurður hvort ekki hefði verið rafmagnað andrúmsloft þegar fimm rithöfundar keyrðu vestur fyrir fjall í Land Cruiser jeppa til að lesa upp úr skáldverkum sínum í Ólafsvík. Ferðafélagar Einars voru þau Þorgrímur Þráinsson sem stýrði Land Cruiser-jeppanum af stakri snilld, Stefán Máni, Auður Jónsdóttir og Hallgrímur Helgason.

Þorgrímur segist fyrst hafa gert sér grein fyrir ábyrgð sinni sem bílstjóri þegar hann leit yfir hópinn og áttaði sig á verðmæti hans.

„Já, þetta hefði getað orðið dýrt og íslenskar bókmenntir hefðu aldrei náð sér á strik ef ferðalagið hefði farið illa og landslið fagurbókmennta horfið af sjónarsviðinu. Maður verður kannski að endurskoða þetta, að setja ekki öll eggin í sömu körfu. Ég keyrði í það minnsta mjög varlega heim eftir þessa uppgötvun," segir Þorgrímur sem staðið hefur fyrir þessum skáldaferðum undanfarin átta ár í samstarfi við Framfarafélagið í Ólafsvík.

Þorgrímur bætir því við að það hefði eiginlega komið honum á óvart hversu vel bíllinn hans leit út eftir ferðalagið. Rithöfundar væru augljóslega hin mestu snyrtimenni. Hápunktur kvöldsins var hins vegar matarboð sem foreldrar Stefáns Mána stóðu fyrir á heimili sínu við Fornu-Fróðá. Borðin ætluðu að kikna undan kræsingunum og eftir því sem Fréttablaðið kemst næst stóðu skáldin nánast á beit.

„Já, maður verður víst að viðurkenna það, ég þurfti allavega ekki að borða morgunmat í morgun," segir Þorgrímur.