Lykilleikur hjá Hamar í kvöld

Hamar mætir Fjölni í 1. deild karla í körfubolta í kvöld. Með sigri er liðið í afar góðri stöðu um að tryggja sér sæti í efstu deild karla. Leikurinn hefst klukkan 19.00 í kvöld og fer fram í Hveragerði.

Hamar er nú með fjögurra stiga forystu á Val og Hauka sem koma næst. Ef Hamar vinnur í kvöld er liðið því með sex stiga forystu þegar aðeins þrjár umferðir eru til leiksloka. Liðið þyrfti því aðeins einn sigur til viðbótar til að gulltryggja sæti sitt.

Ágúst Björgvinsson er þjálfari Hamars og segir leikinn í kvöld afar mikilvægan.

„Með sigri í kvöld lítur þetta mjög vel út hjá okkur," sagði hann. „Við eigum svo eftir að mæta Val og Haukum og væri gott að vera með eins mikið forskot á þessi lið og mögulegt er þegar kemur að þeim leikjum."

Hamar vann báðar fyrri viðureignir sínar gegn þessum liðum og er því í góðri stöðu fyrir framhaldið. Hamar mætir svo Þór frá Þorlákshöfn í lokaumferðinni í næsta mánuði og getur tryggt sér efsta sæti deildarinnar með sigri í þeim leik þó svo að liðið myndi tapa bæði fyri Val og Haukum. En það miðast allt við það að vinna Fjölni í kvöld.

Hamar vann fyrstu ellefu leiki sína á tímabilinu en tapaði svo fyrir KFÍ á útivelli í lok janúar. Síðan þá hefur liðið unnið tvo leiki.

„Þetta tímabil hefur verið mjög flott hjá okkur," sagði Ágúst. „Við búum það vel að við erum með leikmenn í öllum stöðum og fær því hver leikmaður að njóta sín vel. Leikmenn bera virðingu hverjir fyrir öðrum og er það mikilvægur hluti af okkar gengi."

Ágúst segir að vegna fækkunar erlendra leikmanna í efstu deild sé munurinn minni a úrvalsdeildinni og 1. deildinni minni en oft áður.

„Við höfum verið að spila við úrvalsdeildarlið í æfingaleikjum í vetur og þótt þeir skipti auðvitað minna máli hafa þetta verið jafnir og spennandi leikir. En ég ætla að bíða með allar yfirlýsingar þar til við erum öruggir upp," sagði Ágúst í léttum dúr.