Terry hefur ekki áhyggjur af leikbanni

Varnarjaxlinn John Terry hjá Chelsea segist ekki hafa áhyggjur af því að lenda í leikbanni í kvöld þegar Chelsea sækir Liverpool heim á Anfield í Meistaradeildinni í kvöld.

Ef Terry fær áminningu á Anfield í kvöld verður hann í leikbanni í síðari leiknum á Stamford Bridge í næstu viku. Hann ætlar ekki að láta það hafa áhrif á leik sinn í kvöld.

"Ég veit að ég er gulu spjaldi frá leikbanni, en ég mun eiga við það á sama hátt og ég gerði gegn Juventus þegar ég var í sömu stöðu. Ef ég þarf að vinna návígi, þá geri ég það. Ég fer ekki inn í leikinn með neitt annað fyrir augum," sagði fyrirliðinn.

"Auðvitað vona ég samt að ég lendi ekki í því að eiga slæma tæklingu. Ég á von á því að þetta verði al-enskur leikur. Þeir verða með áhorfendur á bak við sig og við munum reyna allt sem við getum til að skora. Ég vona að dómarinn (Claus Bo Larsen) leyfi okkur að spila okkar leik."