Fiskveiðiárið gefur forskot

Norðmenn verða af verulegum verðmætum fyrir sjávarafurðir sínar og gætu lært af Íslendingum hvernig á að hlusta eftir þörfum markaðarins. Þetta segir Yannick Forget-Dugaret, forstjóri stærsta framleiðanda og dreifingaraðila ferskra sjávarafurða í Frakklandi. Fyrirtæki hans Pomona, sem er með höfuðstöðvar í Boulogne, rekur 18 dreifingarstöðvar þar í landi.

Haft er eftir Forget-Dugaret á heimasíðu LÍÚ að Norðmenn verði af verulegum verðmætum þar sem þeir veiða nánast allan sinn þorsk á fyrri hluta ársins.

„Við borgum sex evrur á kíló fyrri hluta ársins en verðið fer allt upp í tólf evrur á kíló frá september og fram til ársloka,“ segir hann í viðtali við vefmiðilinn IntraFish.

Lykilatriði er að Norðmenn miða við almanaksárið í fiskveiðistjórn en á Íslandi hefst fiskveiðiárið 1. september. Síðustu mánuði ársins eru Íslendingar og Færeyingar því í góðri stöðu á markaði. Í ofanálag segir Forget-Dugaret Íslendinga sveigjanlegri þegar kemur að því að uppfylla kröfur kaupenda.

Það komi vel í ljós í viðskiptum með saltfiskafurðir, þar sem Norðmenn haldi fast í eigin hefðir og hlusti ekki nægilega eftir þörfum markaðarins. - shá