Grísk paprikusúpa: Gleður og nærir

Þórdís Sigurðardóttir heilsuráðgjafi starfar hjá Happi sem framreiðir holla matarpakka á Höfðatorgi. Hún miðlar okkur uppskrift að kaldri, grískri paprikusúpu.

„Paprikusúpan er holl, góð og næringarrík. Svo er hún það falleg að erfitt er að standast hana og manni líður líka vel á eftir," segir Þórdís um hina sumarlegu, grísku paprikusúpu sem hún gefur okkur uppskrift að. Hún upplýsir að í rauðri papriku sé meira C-vítamín en í appelsínu og fleiri góð efni sem líkami okkar þarfnist. Súpan er borðuð köld og Þórdís bendir á að hún sé frábær til að taka með sér í nesti, hvort sem er í útilegu eða litla lautarferð.

Þórdís lærði heilsu- og næringarráðgjöf í New York og gekk til liðs við heimsendingarþjónustuna Happ um síðustu áramót. Þar nýtist þekking hennar vel. "Við erum að hjálpa fólki að borða hollt. Gerum allt frá grunni og ferskt hráefni er lykilatriðið," segir hún.

Í síðasta mánuði flutti Happ í Turninn á Höfðatorgi og fyrir fáum dögum var byrjað að afgreiða þar rétti úr matarpakkanum út í nýjan sólskála. Svo er áformað að opna veitingastað í ágúst. - gun

5 stórar paprikur

4 tómatar

1 stór laukur

3 msk. ólífuolía

2 lárviðarlauf

2 tsk. kúmin

Þurrkaðar chilli-flögur

1 sellerí

500 ml HaPP grænmetiskraftur

Börkur af ½ sítrónu

Handfylli af basillaufum

Steinselja

Grísk jógúrt

Byrjaðu á því að skera niður laukinn og hita hann í olíunni þar til hann er orðinn glær. Á meðan laukurinn er að eldast taktu helminginn af paprikunum og skerðu þær í teninga ca 1,5 cm. Hinn helmingurinn af paprikunum, fræin og afskurðurinn er sett á pönnuna með lauknum, ásamt 1 tsk. af salti, kúmin og chilli-flögum. Steiktu þetta saman í 5 mín - passaðu að hafa hitann ekki of háan. Bættu þá HaPP grænmetiskrafti út í og láttu sjóða í u.þ.b. 15 mínútur.

Taktu þá lárviðarlaufin úr. Maukið því næst súpuna í "blender" eða með töfrasprota þar til súpan er alveg "mjúk". Þetta getur tekið nokkrar mínútur. Látið súpuna þá standa þar til hún er orðin köld. Bætið þá við selleríi, paprikuteningum og sítrónuberkinum. Látið standa þar til hitinn á súpunni er við stofuhita, setjið þá súpuna í ísskáp og látið bíða þar í nokkra klst. eða yfir nótt. Að lokum, takið súpuna úr kælinum hálftíma áður en hún er borin fram. Hrærið í súpunni, setjið í skálar og grísku jógúrtina ofan á og þá basil og steinselju þar ofan á og berið fram með kærleika og gleði.