Formsatriði að ganga frá nýjum samningi Ronaldinho

Umboðsmaður Ronaldiniho segir að það sé aðeins formsatriði að Brasilíumaðurinn knái skrifi undir nýjan þriggja ára samning við AC Milan.

Ronaldinho sagði fyrr í vikunni að hann ætlaði að vera áfram hjá Milan á næsta tímabili en hann á eitt ár eftir af núverandi samningi sínum.

En Roberto de Assis, bróðir og umboðsmaður Ronaldinho, er þess fullviss að Ronaldinho muni skrifa undir nýjan þriggja ára samning þegar núverandi samningur rennur út. Nýr stuðningsaðili AC Milan, flugfélagið Emirates, mun greiða að mestu fyrir þann samning.

„Við erum að vinna að því að komast að samkomulagi við Emirates," sagði de Assis við ítalska fjölmiðla. „Við erum reiðubúnir að klára núverandi samning og svo munum við tala um nýjan samning. Þegar við kemur að því munum við skrifa undir samning sem gildir til 30. júní árið 2014. Það liggur ekkert á - þetta er bara formsatriði," sagði hann.