Heather Ezell með þrennu þriðja leikinn í röð - Haukar í undanúrslit

Heather Ezell náði þrefaldri tvennu þriðja leikinn í röð þegar Haukakonur komust í undanúrslit Subwaybikars kvenna í körfubolta eftir 84-61 sigur á Snæfelli í Stykkishólmi í dag. Ezell var með 23 stig 15 fráköst og 10 stoðsendingar í leiknum.

Haukar unnu mjög öruggan sigur. Liðið var komið tíu stigum yfir eftir fyrsta leikhlutann, 26-16, og var með 17 stiga forskot í hálfleik, 50-33.

Þrátt fyrir að hafa náð þrennunni þá hitti Ezell ekki vel en aðeins 5 af 20 skotum hennar fóru rétta leið og þá var hún með 8 tapaða bolta.

Kiki Lund var næststigahæst hjá Haukum með 18 stig og þá skoraði Helena Hólm 11 stig á 13 mínútum.

Sherell Hobbs var með 35 stig og 11 fráköst hjá Snæfelli og Gunnhildur Gunnarsdóttir skoraði 12 stig.