Hannar leikmyndina í Rocky Horror

„Ég vann í Þjóðleikhúsinu alla mína skólagöngu og leikmyndahönnun var í rauninni það sem ég ætlaði alltaf að gera. Svo tók myndlistin völdin og þetta fór á hilluna í nokkur ár," segir Pétur Gautur myndlistarmaður en hann sér um að hanna leikmyndina í Rocky Horror söngleiknum sem frumsýndur verður á Akureyri þann 10. spetember, Pétur er nú betur þekktur fyrir myndlistina en leikmyndagerð en hann segist í rauninni hafa byrjað í leikhúsinu.

„Ég ákvað að fara í leikmyndahönnun þegar ég var búin að læra myndlist í Danmörku og komst meira að segja inn í Konunglega leiklistarskólann þar," segir Pétur en hann fékk hjálp frá Þjóðleikhúsinu hér heima, þar sem hann var að vinna, við að komast inn í þennan fræga skóla.

„Ég hef alltaf verið viðloðandi leikhús," segir Pétur Gautur en það eru orðin nokkur ár síðan hann fékkst við leikhús síðast og hann sér ekki eftir að hafa tekið þessa sýningu að sér. „Ég er mjög spenntur fyrir þessu verkefni enda ekki á hverjum degi sem maður fær tækifæri til að blanda saman leikriti og rokktónleikum," segir Pétur Gautur en hann hefur fengið til liðs við sig ljósahönnuði sem aðstoða hann í að gera sýninguna sem flottasta.

„Þetta verður rosasýning. Ég ætla ekki að gefa of mikið upp um hvernig leikmyndin muni líta út. Verkið Rocky Horror er svo frægt og allir með ákveðnar hugmyndir um hvernig allt á að líta út." segir Pétur en hann er fullviss um að enginn verði fyrir vonbrigðum með þessa uppfærslu á söngleiknum fræga. -áp