Danny Glover handtekinn

Leikarinn Danny Glover er sannkallaður aðgerðasinni sem sýnir það í verki. Á föstudaginn stóð hann vaktina fyrir framan höfuðstöðvar franska matvælaframleiðandans Sodexo í Maryland í Bandaríkjunum.

Glover var þar mættur með fjölda fólks til að mótmæla aðgerðum fyrirtækisins. Nokkrum dögum áður reyndi Sodexo með hörðu að koma í veg fyrir að starfsmenn þess stofnuðu verkalýðsfélag. Glover var á endanum handtekinn þegar hann fór yfir línu sem lögreglan hafði sett utan um mótmælendur.

Þetta er ekki í fyrsta skipti sem Danny Glover lætur húmanísk mál sig varða. Skemmst er þess að minnast þegar hann hvatti kynna á Óskarsverðlaunahátíðinni, meðal annars Sean Penn og Quentin Tarantino, til að sneiða framhjá jakkafötum frá Hugo Boss. Ástæðan voru áætlanir fyrirtækisins um að loka verksmiðjum og segja 300 manns upp.