Milljarðaskilnaður Tigers

Tiger Woods og Elin Norde­gren er formlega skilin eftir sex ára hjónaband. Ekki liggur fyrir hversu háa fjárhæð Elin fær frá Tiger en þau munu hafa sameiginlegt forræði yfir börnunum tveimur.

Tiger og Elin komu fyrir dómara í Panama City á Flórida til að hlýða á úrskurð dómara í skilnaðarmáli þeirra. Í kjölfarið sendu þau út sameiginlega fréttatilkynningu þar sem kom fram að velferð barnanna þeirra tveggja, hinnar fjögurra ára gömlu Sam og hins átján mánaða gamla Charlie, hefði verið höfð að leiðarljósi við skilnaðinn.

„Þegar það lá fyrir að hjónabandinu væri lokið var það okkar meginatriði að tryggja börnunum okkar góða framtíð. Næstu vikur og mánuðir verða þeim erfiðir þar sem þau þurfa að aðlagast nýjum aðstæðum. Þess vegna er það okkur mikilvægt að tryggja friðhelgi einkalífsins,“ segir í yfirlýsingunni.

Fram kom á vefmiðlum að bæði Tiger og Elin hefðu farið á sameiginlegt foreldranámskeið til að geta undirbúið börnin sem best fyrir skilnaðinn og þau létu það koma skýrt fram í yfirlýsingunni að þau hygðust halda góðu sambandi, barnanna sinna vegna. Þær fréttir eru þó misvísandi, bandarískir fjölmiðlar héldu því fram að þau hefðu ferðast saman til Panama í einkaþotu en sænski vefurinn Expressen sagði að þau hefðu reynt að forðast hvort annað í lengstu lög þegar þau komu í réttarsalinn.

Annars vita bandarískir fjölmiðlar lítið um smáatriði skilnaðarsamningsins.

Flestir hallast að því að Elin fái heimili þeirra hjóna í Orlando og húseign sem hún keypti á sænskri eyju. Hins vegar er á reiki hversu háa fjárhæð Elin fær frá Woods sem er einn ríkasti íþróttamaður heims, tölur frá tólf milljörðum og upp í sextíu milljarða hafa verið nefndar en flestir fjölmiðlar hallast að því að Elin hafi verið gert að þegja um hjónabandið á opinberum vettvangi. Elin skrifaði undir kaupmála þegar hún gekk að eiga Woods enda var hann þá þegar hæstlaunaði íþróttamaður heims.

Blaðamaður Wall Street Journal skrifaði á vef blaðsins að sú saga gengi á gjaldeyrismarkaðinum að fréttir af skilnaðinum hefðu haft áhrif á gengi sænsku krónunnar gagnvart dollaranum í skamma stund. Bandarískir fjölmiðlar hafa jafnframt komist á snoðir um að Elin hafi sett það sem skilyrði að Tiger mætti ekki kynna nokkra konu fyrir börnunum sínum nema hann hefði ákveðið að ganga í hjónaband með henni.

Níu mánuðir eru liðnir síðan tilkynnt var að Tiger hefði klesst glæsibifreið sína fyrir utan heimili sitt í Orlando. Talsmenn Tigers reyndu í fyrstu allt hvað þeir gátu til að kveða niður fréttir af árekstrinum en skömmu síðar kom í ljós kom að hann hafði átt fjölda hjákvenna sem flestar staðfestu samband sitt við kylfinginn.

Framhjáhaldið varð Tiger mikill álitshnekkir, hann hefur ekki náð sér á strik á golfvellinum og ímynd hans þykir svo löskuð að flestir eru þess fullvissir að hann nái ekki aftur þeim vinsældum sem hann hafði umfram aðra íþróttamenn.