Benitez vill vinna með Balotelli

Rafa Benitez, þjálfari Inter, reyndi í dag að gera lítið úr þeim sögusögnum að argentínski miðjumaðurinn Javier Mascherano myndi fylgja honum frá Liverpool til Inter.

Sú saga hefur verið á sveimi í allt sumar og er ekki að deyja.

"Mascherano til Inter? Inter hefur áhuga á öllum hágæðaleikmönnum. Við þekkjum hann vel en yfirmenn félagsins taka ákvörðun í leikmannamálum. Ég vil vinna með þeim leikmönnum sem eru fyrir hjá félaginu," sagði Benitez sem bíður spenntur eftir því að vinna með Balotelli sem er sterklega orðaður við félög á Englandi.

"Ég vil kynnast Balotelli og fá tækifæri til að meta hann. Ég þarf að kynnast og meta alla leikmennina. Balotelli er hágæðaleikmaður sem vill spila og vinna. Það er mikilvægur eiginleiki."