Guinness-auglýsing á Skálafellsjökli

Írski bjórframleiðandinn Guinness valdi Skálafellsjökul til að taka upp sjónvarpsauglýsingu á dögunum. Kvikmyndagerðarmenn náðu rétt svo að forða sér undan eldgosinu.

„Menn þurftu að vera ansi snöggir að hugsa til að púsla þessu öllu saman," segir Leifur B. Dagfinnsson, framleiðandi hjá framleiðslufyrirtækinu True North. Fyrirtækið tók upp auglýsingu fyrir írska bjórframleiðandann Guinness á Skálafellsjökli. Auglýsingastofan vildi ná glæsilegu sólarlagi og því lagði kvikmyndagerðarfólkið snemma af stað upp á Skálafellsjökul að morgni 19. apríl.

„Við náðum alveg gullfallegum myndum og vorum bara að hlusta á fréttir milli fjögur og fimm og heyrðum þá af hugsanlegu eldgosi í Eyjafjallajökli," útskýrir Leifur en þá tók við ansi hröð atburðarás því loka þurfti brúnni yfir Markarfljót í kjölfar gossins og vegurinn suður fór í sundur á stórum kafla.

„Það þýddi því ekkert annað en að koma sem flestum í flug frá Höfn og það voru einhverjir sem neyddust til að keyra hina leiðina," útskýrir Leifur.

En þetta var ekki allt því strax daginn eftir hófust tökur í myndveri og þá vantaði sárlega svokallaða Phanton-myndavél sem er einstök og getur tekið þúsund ramma á sekúndu. Hún var hins vegar föst í London vegna flugbannsins fræga ásamt tveimur starfsmönnum. „Við leituðum úti um allt, til Suður-Afríku, Kanada, Bandaríkjanna en fundum hana ekki. Svo þurftum við að sérsmíða flöskurnar frægu og frysta þær á sérstakan hátt og þetta var náttúrlega heljarinnar ævintýri, svo ekki sé meira sagt."

Starfsmenn auglýsingastofunnar sem höfðu veg og vanda af auglýsingunni voru síðan auðvitað fastir hér á Íslandi en að sögn Leifs var það hálfgert lán í óláni. „Þeir fóru í þyrluferð og á hestbak þannig að þetta varð svona meiri túristapakki sem er bara gott."

freyrgigja@frettabladid.is