Sigríður og Helgi Magnús verða saksóknarar

Sigríður J. Friðjónsdóttir verður tilnefnd sem saksóknari Alþingis og Helgi Magnús Gunnarsson verður tilnefndur sem varasaksóknari í málinu gegn Geir Haarde fyrrverandi forsætisráðherra, samkvæmt heimildum fréttastofu.

Þingmannanefnd sem fjallaði um skýrslu rannsóknarnefndar Alþingis kemur saman núna klukkan tíu þar sem tilnefningarnar verða ræddar. Alþingi mun svo kjósa saksóknara. Til stendur að sami háttur verði hafður á við kjörið og þegar að Umboðsmaður Alþingis verður kosinn.

Sigríður Friðjónsdóttir er vararíkissaksóknari en Helgi Magnús Gunnarsson er saksóknari hjá efnahagsbrotadeild Ríkislögreglustjóra.