Rannsókn sérstaks saksóknara á Exeter Holdings á lokastigum

Rannsókn sérstaks saksóknar á viðskiptum Exeter Holdings ehf. með stofnfjárbréf í Byr er langt komin en það er þó óljóst hvenær og hvort ákærur verði gefnar út.

Þetta staðfestir Ólafur Þór Hauksson, sérstakur saksóknari.

Byr lánaði Exeter Holdings 1,4 milljarðs króna lán í tveimur hlutum í október og desember 2008. Féð varði félagið til þess að kaupa 1,8 prósenta stofnfjárhlut í Byr á yfirverði. Seljendur voru eigendur og stjórnendur Byrs.

Félagi var í meirihlutaeigu Ágústs Sindra Karlssonar lögmanns.

Til rannsóknar er grunur um brot á auðgunarbrotakafla almennra hegningarlaga í tengslum við umrædda sölu á stofnbréfum og lánagerningum þeim tengd. Um er að ræða verulega fjárhagslega hagsmuni og rannsóknin tengist fjölda manns.

Sérstakur Saksóknari framkvæmdi meðal annars tvær húsleitir vegna málsins á síðasta ári.

Samkvæmt upplýsingum frá Ólafi þá er rannsóknin á lokastigum. Fréttastofa RÚV hafði áður greint frá því að ákærur gætu litið dagsins ljós í lok mánaðarins. Ólafur sagðist ekki geta sagt neitt til um það.