Juventus steinlá á heimavelli gegn Palermo

Palermo gerði sér lítið fyrir og skellti Juventus 0-2 á Ólympíuleikvanginum í Tórínó í kvöldleik ítalska boltans en staðan var markalaus í hálfleik.

Fabrizio Miccoli kom gestunum á bragðið með marki eftir klukkutíma leik og varamaðurinn Igor Budan innsiglaði svo sigur Palermo með marki á 82. mínútu.

Juventus virtist hafa náð að rétta úr kútnum með tveimur sigurleikjum í röð í deildinni áður en kom að leik kvöldsins eftir að hafa spilað sex leiki þar á undan án þess að vinna.

Palermo hefur hins vegar skotið Juventus aftur niður á jörðina og þó svo að Juventus sé enn í fjórða sæti deildarinnar þá eru Napoli, Palermo og Sampdoria farin að narta í hælana á Torínóborgarliðinu í baráttunni um meistaradeildarsæti.