Golfið hjá Justin í lægð

Justin Timberlake viðurkennir í samtali við tímaritið People að honum hafi farið mikið aftur í golfi. Ástæðan sé einföld: hann hafi einfaldlega ekki haft tíma til að sinna íþróttinni sökum velgengni sinnar.

Timberlake er einn fremsti popptónlistarmaður heims um þessar mundir og hefur jafnframt getið sér gott orð fyrir leik í kvikmyndum, nú síðast í The Social Network en hann leikur einnig í kvikmyndunum Friends with Benefits og Bad Teacher. Þar leikur hann á móti kærustu sinni fyrrverandi, Cameron Diaz.

Golfið hefur þar af leiðandi fengið að líða fyrir annirnar.

„Leikur minn á vellinum hefur verið skelfilegur en það er bæði gömul saga og ný. Þegar þér gengur vel í vinnunni þá kemur það niður á leiknum. Og þú vinnur til að geta spilað golf," segir Timberlake sem er einmitt gestgjafi Shriners Hospitals for Children Open-golfmótsins í Las Vegas. Þá mun hann troða upp á lokakvöldi PGA, samtaka atvinnukylfinga í Bandaríkjunum, ásamt Sir Elton John, og hinni nýfráskildu Christinu Aguilera.

Timberlake hyggst hins vegar taka golfið fastari tökum því hann hefur komið fyrir púttflöt við glæsivillu sínu í Los Angeles svo að hann geti fínpússað stutta spilið hvenær sem hann vill.