Real Madrid í viðræðum vegna Thiago Silva

Real Madrid og AC Milan eiga nú í viðræðum um kaup fyrrnefnda félagsins á Brasilíumanninum Thiago Silva samkvæmt umboðsmanni leikmannsins.

Umboðsmaðurinn, Paolo Tonietto, sagði þó að Silva væri hæstánægður hjá AC Milan. Silva hefur einnig verið orðaður við Barcelona en Tonietto sagði það eingöngu vangaveltur.

„Það er hins vegar áhugi hjá Real Madrid sem á nú í viðræðum við AC Milan," sagði hann. „Ég veit ekki hvort að þær beri einhvern árangur en það er undir forsetum félaganna komið."

Tonietto sagði einnig að þetta væri ekki í fyrsta skiptið sem Jose Mourinho, núverandi stjóri Real Madrid og fyrrum stjóri Inter, hafi reynt að fá Silva til liðs við sig.

„Þegar hann tók við Inter hafði hann samband við okkur. En það var ekki hægt að ganga frá samningum og það endaði með því að Milan keypti hann."

Silva gekk í raðir AC Milan frá Fulminense í fyrra. Hann er 25 ára gamall varnarmaður.