Skóla­meistari MS fjar­lægði fjall af skít af tröppunum á Verzló

„Ég er mjög leiður og sorgmæddur yfir þessu. Þetta fór algjörlega úr böndunum," segir Már Vilhjálmsson, skólameistari menntaskólans við Sund.

Hann mætti ásamt nokkrum kennurum skólans á skólalóð Verslunarskóla Íslands í gærmorgun til að moka upp skít sem nokkrir nemendur MS höfðu dreift við inngang Versló en skólarnir mætast í úrslitum ræðukeppninnar Morfís á föstudaginn í stóra sal Háskólabíós. Már segir rannsókn málsins í fullum gangi innanhúss og hann búist við því að niðurstaða í því verði klár í dag.

Finnur Ágúst Ingimundarson, formaður Málfundarfélagsins í Versló, hvatti nemendur í skólanum til að sýna stillingu og grípa ekki til hefndaraðgerða.

„Nei, skömmin er þeirra. Við fengum að hjálpa til við að skila skítnum aftur og dreifa honum á túnin, með góðfúslegu leyfi skólameistarans," segir Finnur.

Hefð hefur myndast fyrir því að skólar sem mætast í úrslitum Morfís reyni að gera andstæðingum sínum lífið leitt í úrslitavikunni með léttum hrekkjum en Már segir hins vegar að þarna hafi menn farið rækilega yfir strikið.

„Menn hafa látið spennuna hlaupa með sig í gönur. Auðvitað er mikill taugatitringur vegna úrslitanna en þetta var ósmekklegt og leiðinlegt fyrir okkur og ekki síst leiðinlegt fyrir Versló," segir Már sem mokaði skítinn upp með skóflur og hjólbörur einar að vopni því ekki gafst tími til að finna aðra menn í djobbið.

„Ég er heldur ekkert of góður til að moka skít og maður ber ábyrgð á sínum nemendum. Mér þótti hins vegar vænst um að ný stjórn nemendafélagsins okkar mætti líka og hjálpaði okkur, henni var ekki skemmt yfir þessu."

Skólameistarinn bætir því við að nú sé rétti tíminn til að bera á og að skíturinn sem var við inngang Versló hafi verið nýttur til góðs.

„Við notuðum hann til að bera á hjá okkur, það var alger óþarfi að henda honum," útskýrir Már og tekur fram að hann sé í góðu sambandi við yfirstjórn Verslunarskólans og hrósar henni fyrir bæði þolinmæði og skilning. „Það gætu verið skemmdir í anddyrinu en við munum bara bæta það." freyrgigja@frettabladid.is