Brynjar Þór: Sætt að setja niður svona þrista

Brynjar Þór Björnsson var stigahæsti leikmaður KR í bikarúrslitaleiknum gegn Grindavík í gær en KR varð í dag bikarmeistari í fyrsta sinn í 20 ár.

„Við fórum að hitta eins og ég veit ekki hvað,“ sagði hann spurður um hvað hafi gert gæfumuninn eftir jafnan fyrri hálfleik í dag.

„Við hættum ekki og héldum áfram að sækja á þá. Þeir vissu ekkert hvað þeir ættu að gera.“

„Það er vörn sem vinnur titla og þegar sóknin kemur með áttu þeir ekki séns,“ sagði hann í samtali við Vísi en viðtalið í heild sinni má sjá með því að smella á hlekkinn hér fyrir ofan.

„Þetta var dæmigerður bikarleikur þar sem allt getur gerst. Þeir voru að spila vel og við þokkalega. En svo gáfum við aðeins í.“

Brynjar setti niður fimm þriggja stiga skot í leiknum. „Það er fátt sætara en að setja niður svona þrista á réttum tíma.“