Umfjöllun: Engir meistarataktar hjá Snæfelli en sigur

Nýliðar Hauka komu meistaraliði Snæfells í opna skjöldu í fyrsta leiknum í 8-liða úrslitum Iceland Express deildarinnar í kvöld. Þrátt fyrir að Snæfell hafi marið 76-67 sigur var leikur þeirra langt frá því að vera sannfærandi. Aðeins léleg skotnýting Haukaliðsins varð til þess að liðið náði ekki að leggja meistarana að velli.

Það var líkt og leikmenn Snæfells hefðu ekki áttað sig á því að úrslitakeppnin væri hafin. Og það væri titilvörn þar að auki. Fjárhúsið var langt frá því að vera fullsetið og það var deyfð yfir áhorfendum sem og leikmönnum.

Pétur Ingvarsson þjálfari Hauka bauð upp á gott svefnmeðal með lúshægum sóknarleik. Og það svefnmeðal virkaði. Haukaliðið sótti án afláts í hjarta varnarinnar hjá Snæfelli – og varnartilþrif heimamanna voru ekki útgáfuefni í kennslubók. Staðan var 14-6 fyrir Hauka eftir 5 mínútur.

Snæfell varð fyrir miklu áfalli undir lok fyrsta leikhluta þegar Sean Burton snéri sig á ökkla og er óvist með framhaldið hjá honum. Burton gat varla stigið í fótinn í leikslok en hann missti af lokakafla úrslitakeppninnar í fyrra vegna meiðsla.

Staðan var 40-41 fyrir Hauka í hálfleik. Snæfell lék svæðisvörn í síðari hálfleik sem skilaði góðum árangri. Haukar skoruðu aðeins 8 stig í þeim leikhluta en þeir fengu færin til þess að skora.

Á lokakaflanum náðu lykilmenn Snæfells að sýna sitt rétta andlit. Jón Ólafur Jónsson og Pálmi Freyr Sigurgeirsson fóru þá fyrir liðinu. Hinsvegar var það góð „þriggja stiga skorpa“ sem Egill Egilsson stóð fyrir sem kveikti neistann hjá Snæfelli.

Næsti leikur fer fram á Ásvöllum á mánudaginn og það verður án efa fróðlegt að fylgjast með gangi mála í þeim leik.



Snæfell-Haukar 76-67 (15-24, 25-17, 15-8, 21-18)Snæfell: Ryan Amaroso 18/7 fráköst, Jón Ólafur Jónsson 13/9 fráköst/6 stoðsendingar, Zeljko Bojovic 11/6 fráköst, Pálmi Freyr Sigurgeirsson 11/6 stoðsendingar, Emil Þór Jóhannsson 8, Egill Egilsson 8/4 fráköst, Sveinn Arnar Davíðsson 4, Sean Burton 3.

Haukar: Gerald Robinson 24/15 fráköst, Semaj Inge 21/9 fráköst, Örn Sigurðarson 9/6 fráköst, Sævar Ingi Haraldsson 5/10 stoðsendingar, Sveinn Ómar Sveinsson 4/7 fráköst, Emil Barja 2/5 fráköst, Óskar Ingi Magnússon 2.