Umfjöllun: Njarðvík í úrslit í fyrsta sinn

Njarðvík er komið í úrslit um Íslandsmeistaratitilinn í Iceland Express deild kvenna eftir sigur liðsins í oddaleik gegn Hamar, 67-74, í Hvergerði í kvöld. Þar með hefur liðið brotið blað í sögu félagsins en aldrei áður hefur kvennalið Njarðvíkur komist í úrslitin um Íslandsmeistaratitilinn.

Gríðarleg stemmning var í íþróttahúsinu í Hveragerði í kvöld og voru bæði lið vel studd áfram af stuðningsmönnum sínum. Njarðvíkingar byrjuðu leikinn vel og áttu heimakonur í Hamar erfitt með að leysa vörn gestanna á upphafmínútum leiksins. Hamar komst hins vegar betur inn í leikinn eftir að þær fóru að pressa Njarðvíkurstúlkur hátt upp völlinn. Staðan eftir fyrsta leikhluta 19-22 fyrir gestina úr Njarðvík sem ætluðu greinilega ekki að láta fara illa með sig líkt og í þriðja leik liðanna á dögunum.

Njarðvík hóf annan leikhluta af álíka krafti og það gerði í þeim fyrsta. Njarðvíkurstúlkum tókst vel að leysa varnarleik Hamars. Hamarsstúlkum óx hins vegar ásmegnin eftir því sem leið á leikhlutann og jafnaði leikinn í stöðunni 29-29 þegar leikhlutinn var hálfnaður. Staðan í hálfleik, 40-41 fyrir gestina í afar jöfnum og spennandi leik. Jaleesa Butler dró vagninn hjá Hamri og skoraði 17 stig í fyrri hálfleik.

Liðunum gekk erfiðlega að finna leiðina að körfunni í byrjun þriðja leikhluta en um miðbik hálfleiksins tóku Njarðvíkingar við sér. Ágúst Björgvinsson, var langt frá því að vera sáttur við leik sinna stúlkna og tók leikhlé þegar fjórar mínútur voru eftir af þriðja leikhluta. Staðan fyrir lokaleikhlutann 52-55 og gríðarleg stemmning á pöllunum í Hveragerði.

Njarðvíkingar lögðu allt sem þær áttu í lokaleikhlutann og með magnaðri baráttu og öflugum varnarleik náði liðið að innbyrða sögulegan sigur og farseðilinn inn í úrslitin um Íslandsmeistaratitilinn. Mest náði liðið átta stiga forystu þegar tvær mínútur voru eftir af leiknum og héldu þær ró sinni þar til að leikurinn var allur. Lokatölurnar 67-74 og það verða liðin af nágrannaslagur í úrslitunum þar sem Njarðvíkingar mæta Keflavík.

Shayla Fields var atkvæðamest í liði Njarðvíkur með 25 stig og tók auk þess 7 fráköst. Julia Demirer skoraði 14 stig og tók 15 fráköst. Hjá Hamar skoraði Jaleesa Butler 34 stig fyrir Hamar og tók 11 fráköst.