Liverpool og Fiorentina komast að samkomulagi um Aquilani

Umboðsmaður ítalska knattspyrnumannsins Alberto Aquilani leggur áherslu á að ekki sé frágengið að Aquilani gangi til liðs við Fiorentina. Að hans sögn hafa félögin komist að samkomulagi en Aquilani eigi þó enn eftir að semja við ítalska félagið.

„Fiorentina og Alberto hafa ekki komist að samkomulagi,“ sagði Franco Zavaglia umboðsmaður Aquilani við gazzetta.it.

Hann bætti við að öll umræða þess efnis að samkomulag hefði náðst ætti við félögin tvö. Fiorentina hefði ekki samið við Aquilani.

Aquilani spilaði á síðasta tímabili með Juventus í láni frá Liverpool. Eftir ágæta frammistöðu hjá Liverpool á undirbúningstímabilinu sem varð til þess að eigandi Liverpool, John Henry hrósaði honum sérstaklga, veltu menn fyrir sér hvort Aquilani myndi spila með þeim rauðklæddu á komandi tímabili. Allt útlit er fyrir að svo verði ekki.