KR-ingar Reykjavíkurmeistarar í körfubolta

KR-ingar urðu í gær Reykjavíkurmeistarar í körfubolta eftir 106-96 sigur á Fjölni í úrslitaleik sem fram fór í Seljaskólanum. Þetta kemur fram á karfan.is

KR var 51-38 yfir í hálfleik en Fjölnismenn gáfust ekki upp og tókst að komast yfir í lokaleikhlutanum. KR-ingum tókst hinsvegar að ná aftur forystunni og tryggja sér sigurinn.

Það voru þeir Skarphéðinn Freyr Ingason og Ólafur Már Ægisson sem lyftu síðan Reykjavíkurmeistarabikarnum í leikslok en fyrirliðinn Fannar Ólafsson hefur ekkert verið með KR-liðinu í haust.

ÍR-ingar tryggðu sér bronsið með 90-87 sigri á lærisveinum Benedikts Guðmundssonar í Þór Þorlákshöfn og Valsmenn urðu í 5. sæti eftir 100-70 sigur á Ármanni.

Í kvöld ræðst það síðan hverjir verða Reykjanesmeistarar en Stjarnan og Keflavík mætast í Ásgarði í Garðabæ klukkan 19.15 og sigurvegarinn tryggir sér titilinn.