AC Milan á toppinn á Ítalíu

AC Milan skellti sér á topp ítölsku úrvalsdeildarinnar, um stundarsakir að minnsta kosti, með góðum 2-0 útisigri á Genoa.

Zlatan Ibrahimovic og Antonio Nocerino skoruðu mörk AC Milan í kvöld, bæði í seinni hálfleik. Kakha Kaladze fékk að líta rauða spjaldið á 54. mínútu fyrir sína aðra áminningu í leiknum.

AC Milan er nú með eins stigs forystu á Juventus sem á leik til góða gegn Cesena á morgun. Udinese er svo í þriðja sætinu með 24 stig.

Genoa er í níunda sæti deildarinnar með fimmtán stig en liðið hefur tapað fjórum af síðustu sex leikjum sínum.