Iðuhúsið auglýst til útleigu á ný

Iðuhúsið við Lækjargötu í Reykjavík var auglýst til útleigu á mánudag. Sparifélagið, sem hyggst hefja rekstur hins svokallaða Sparibanka á næsta ári, hefur húsið á leigu en reynir nú að losna undan samningnum.

„Sparifélagið leigði húsið af okkur frá 1. september. Þeim samningi hefur ekki verið sagt upp og það eru auðvitað bara ákvæði í þeim leigusamningi sem segja til um hvernig með þau mál skuli farið,“ segir Georg Auðunsson, forstjóri Reita sem eiga Iðuhúsið, og bætir við: „Við höfum hins vegar fallist á að kanna möguleikann á því, í ljósi stöðu Sparifélagsins, að hjálpa þeim við að finna nýjan leigutaka að húsinu sem mundi þá ganga inn í eða taka yfir leigusamninginn.“

Sparifélagið hefur átt í vandræðum með að ljúka fjármögnun nýja bankans og sagði Ingólfur H. Ingólfsson, stjórnarformaður félagsins, í samtali við Markaðinn í gær að félagið þorði ekki öðru en að gefa eftir húsið. Ýmis starfsemi fer nú fram í Iðuhúsinu og má þar nefna bókabúð og veitingastaði. Að sögn Guðjóns eru þeir aðilar framleigutakar Sparifélagsins.

Guðjón segir leigusamning Sparifélagsins vera til nokkurra ára en innihaldi ákvæði sem geri félaginu kleift að losna undan samningnum á næsta ári fái bankinn ekki viðskiptabankaleyfi. Þá segir hann viðbrögðin við auglýsingunni á mánudag hafa verið þannig að hann væri bjartsýnn á að þetta mál leystist.- mþl