Varmá áfram hjá SVFR

Eftir nokkra óvissu liggur fyrir að Varmá/Þorleifslækur verður áfram í sölu hjá Stangaveiðifélagi Reykjavíkur. Sala veiðileyfa hefst innan tíðar. Undanfarin ár hefur SVFR verið með vantasvæðið í umboðssölu fyrir Veiðifélag Varmár og Þorleifslækjar. Hefur sá hátturinn verið hafður á allt frá því að umhverfisslys varð við ána í nóvember árið 2007. Fram að þeim tíma hafði SVFR verið leigutaki en því var breytt í kjölfar slyssins.

Nú hefur veiðileyfasalan aftur verið færð yfir í leigutökuformið. Frá og með komandi vori er Stangaveiðifélag Reykjavíkur á nýjan leik orðinn leigutaki af Varmá, og er það vel. Ekki hefur verið fullmótað með hvaða hætti sala veiðileyfa fer fram en félagsmönnum SVFR mun að sjálfsögðu bjóðast forkaupsréttur af veiðidögum.

Veiði hefst 1. apríl næstkomandi, og því innan við tveir mánuðir í upphaf veiðitímans í ánni. Sala veiðileyfa mun verða rækilega auglýst síðar.

Birt með góðfúslegu leyfi SVFR