Öryggisgæsla aukin vegna Íslenskra fugla

Ríflega 50 eintök eru seld af þeim 100 sem gefin voru út af hátíðarútgáfu bókarinnar Íslenskir fuglar eftir Benedikt Gröndal. Bókin hefur verið til sýnis í Eymundsson í Smáralind í rúma viku og að því er fram kemur í fréttatilkynningu frá útgefanda bókarinnar, Crymogeu, hefur verið stöðugur straumur fólks til skoða bókina og hefur eitt eintak selst á dag síðan sýningareintakið kom í Smáralind. Bókin er sú dýrasta sem fæst á almennum markaði en hún kostar 230.000 krónur.

Viðskiptavinir þurfa að setja upp sérstaka hlífðarhanska áður en þeir handleika gripinn og hefur öryggisgæsla í versluninni verið aukin.

Bókin er nákvæm endurgerð handrits Benedikts Gröndal (1826-1907) sem hann gekk frá um aldamótin 1900. Hún er handinnbundin í sérsútað sauðaleður frá Sjávarleðri á Sauðárkróki af Ragnari Einarssyni bókbindara og er í sérsmíðuðum viðarkassa.

- sbt