Gullbrúðkaup endar í tilfinningalegri rússíbanareið Jónsmessunótt

Leikritið Jónsmessunótt eftir Hávar Sigurjónsson verður frumsýnt í Kassa Þjóðleikhússins í kvöld.

"Þetta er mjög flott verk frá hendi höfundar, leikandi létt en hefur um leið marga fleti og býður upp á margar tengingar við íslenskan samtíma," segir Harpa Arnardóttir, leikstjóri Jónsmessunætur, nýs leikrits eftir Hávar Sigurjónsson sem frumsýnt verður í Kassanum í Þjóðleikhúsinu í kvöld.

Í verkinu er sögð saga fjölskyldunnar, sem endurspeglar samfélagið sem hún hefur lifað í. Fjölskyldufaðirinn vill endurskrifa sögu fjölskyldunnar og í uppsiglingu eru átök um völd og eignir og uppgjör á milli einstaklinganna er óumflýjanlegt.

"Þarna leysast úr læðingi fjölskyldubönd sem eru bæði ógnvænleg og meinfyndin og brúðkaupsafmælið, sem átti að verða létt og skemmtilegt, endar í allsherjar rússíbanareið."

Fjölskyldan í verkinu endurspeglar um margt íslenskt samfélag í dag. "Þess vegna eru ný íslensk leikverk svo mikilvæg," segir Harpa. "Þau eru sprottin úr okkar samtíma og segja svo margt um ástandið í dag. Þess vegna er svo mikilvægt að hlúa að leikskáldum."

Þetta er í fyrsta sinn sem Harpa leikstýrir verki í Þjóðleikhúsinu.

"Ég er fyrst og fremst leikkona en hef leikstýrt inn á milli í gegnum tíðina og hef sífellt meira gaman af því." Hún er hæstánægð með leikhópinn, sem og aðra sem að verkinu koma.

"Þetta eru stórkostlegir listamenn og algjörlega frábært að fá að vinna í svona stórum listrænum faðmi. Vinnuferlið er mjög opið og allir taka virkan þátt í sköpuninni. Mér þykir sjálfri mjög gott að vinna í opnu, skapandi og dýnamísku ferli."