Lögreglan hikar ekki við að beita sektum

Skipulögð þjóðhátíðardagskrá í Reykjavík hefst klukkan 10 í fyrramálið með guðsþjónustu í Dómkirkjunni. Eftir það tekur við fjölbreytt dagskrá með skemmtiatriðum um alla miðborg auk hefðbundinna hátíðardagskrárliða eins og ávarps fjallkonunnar.

Lögreglan fylgist sérstaklega með því hvernig ökutækjum er lagt í miðborginni á morgun og beinir þeim tilmælum til fólks að leggja löglega til að komast hjá því að fá sektir eða jafnvel að bílar verði fjarlægðir, stafi af þeim hætta. Mælst er til þess að fólk noti almenningssamgöngur, reiðhjól eða tvo jafnfljóta.

Guðbrandur Sigurðsson, aðalvarðstjóri í umferðardeild lögreglunnar í Reykjavík, segir brýnt að fólk geri sér grein fyrir því að lög um lagningar ökutækja standi þó að um stórviðburði sé að ræða.

„Þau detta ekki úr gildi á 17. júní, Menningarnótt eða á stórum fótboltaleikjum eins og sumir vilja halda," segir hann. Þess má geta að almenn stöðumælasekt er 2.500 krónur, stöðubrotsgjald 5.000 krónur og að leggja í bílastæði fatlaðra kostar 10.000 krónur.

Síðustu ár hefur fjöldi í miðborginni þann 17. júní verið á bilinu 50 til 70 þúsund manns ef veðrið er gott. Veðurstofa Íslands spáir mildu veðri á höfuðborgarsvæðinu með smávegis skúrum síðdegis. Dagskránni í miðborginni lýkur með dansleik á Ingólfstorgi og tónleikum á Arnarhóli, þar sem meðal annars koma fram Ojba Rasta, Múgsefjun og Pollapönk.

sunna@frettabladid.is