Mannætusöngleikur verðlaunaður í New York

„Ég held að þetta séu ein stærstu verðlaun sem íslensk leikhúsframleiðsla hefur fengið," segir Óskar Eiríksson, stofnandi og framkvæmdastjóri Leikhúsmógulsins en framleiðsla þeirra, söngleikurinn Silence!, var í vikunni kosinn besti söngleikur í New York af The Broadway Alliance.

Söngleikurinn er byggður á spennumyndinni Silence of the Lambs, eða Lömbin þagna sem fjallaði um mannætuna Hannibal Lecter, og hefur vakið mikla athygli vestanhafs. The Broadway Alliance verðlaunar leikhúsuppfærslur sem ekki hafa náð á Broadway enn þá en áður hafa sýningar eins og Little Shop of Horrors, Stomp og Blue Man Group unnið verðlaunin og í kjölfarið fengið líf á stóra sviðinu á Broadway.

Óskar segir þetta vera mikinn heiður fyrir Leikhúsmógulinn. „Söngleikurinn hefur nú gengið fyrir fullu húsi í heilt ár í New York og erum við að flytja sýningu frá Greenwich Village upp til Mid Town í stærra húsnæði vegna velgengninnar," segir Óskar en flestar stjörnurnar úr spennumyndinni frægu hafa látið sjá sig á sýningunni. „Jodie Foster, Anthony Heald og leikstjórinn Jonathan Demme hafa öll verið meðal áhorfenda og sýningin nú vakið athygli allra stærstu leikhúsframleiðanda í heimi sem er mjög gaman."

Þetta eru ekki einu verðlaunin sem Silence! hefur unnið því nýverið vann söngleikurinn heil fjögur verðlaun á Tina Awards, sem einnig eru tileinkuð minni uppfærslum í New York.

Leikhúsmógullinn á heimsrétt á Silence! og vinnur nú að því að opna sýninguna í London, Jóhannesarborg, Los Angeles, Chicago og Sidney. „Við opnum í Los Angeles strax í ágúst en í hinum borgunum vonandi á næsta ári," segir Óskar sem bindur einnig vonir við að þessi grínsöngleikur, byggður á spennumyndinni um mannætuna Hannibal Lecter, verði settur upp á Íslandi í framtíðinni.

Leikhúsmógullinn hefur verið starfræktur í 12 ár og hefur meðal annars séð um rekstur Gamla bíós. „Við höfum verið í stöðugri útrás í 12 ár og alltaf á sömu kennitölunni sem er jákvætt."

alfrun@frettabladid.is