Góður árangur af aðgerðum hér

99 prósent sjúklinga sem fara í skurðaðgerðir vegna lungnakrabbameins á Íslandi lifa aðgerðina af og lífslíkur þeirra sem ganga undir aðgerðir hafa batnað mikið. Árangurinn af skurðaðgerðum hér á landi er mjög góður í alþjóðlegum samanburði.

Þetta kemur fram í grein íslenskra vísindamanna við Háskóla Íslands og Landspítalann, sem birtist nýlega í blaðinu Journal of Thoracic Oncology, sem er eitt virtasta tímarit heims á sviði krabbameinslækninga.

Í grein íslensku vísindamannanna var árangur skurðaðgerða vegna lungnakrabbameins á árunum 1994 til 2008 skoðaður. 26 prósent sjúklinga með lungnakrabbamein gengust undir skurðaðgerð, sem er hátt hlutfall miðað við önnur Evrópulönd. Hlutfallið er til dæmis undir 20 prósentum á Norðurlöndunum.

Greinin byggir á meistaraverkefni Húnboga Þorsteinssonar í læknisfræði, en hann er nú kandídat á Landspítalanum. Húnbogi vann verkefnið hjá Tómasi Guðbjartssyni prófessor en Steinn Jónsson, Helgi J. Ísaksson, Ásgeir Alexandersson, Guðrún Nína Óskarsdóttir og Rut Skúladóttir voru aðrir höfundar. - þeb