Húseiningar standa á víðavangi

Húseiningar hafa um nokkra hríð staðið við Reykjanesbraut. Einingarnar eru á nokkuð áberandi stað enda blasa þær við vegfarendum sem keyra Reykjanesbrautina.

Einingarnar eru þó ekki á veginum sjálfum heldur eru þær á hverfisvegi sem liggur samsíða Reykjanesbrautinni. Þær eru því ekki fyrir umferð.

Ásgeir Eiríksson, bæjarstjóri í Vogum, segir einingarnar hafa staðið við veginn í rúma viku, en sjónarvottur fullyrðir hins vegar að þær hafi verið þar mun lengur. Ásgeir segir einingarnar eiga sér eðlilegar skýringar.

„Það er verið að byggja þarna hús í hrauni þannig að þetta eru erfiðar aðstæður. Væntanlega hefur þetta verið eina jafnsléttan sem þeir hafa fundið til þess að tylla einingunum á."

Hann segir biðina eftir að húseiningarnar verði fjarlægðar eðlilega. Það þurfi að steypa plötuna í húsinu á sama tíma og einingarnar séu settar á sinn stað. „Við bara göngum út frá því að það muni gerast einhverja þessa dagana fyrst einingarnar eru komnar á staðinn og búið er að taka út lagnir. Þannig að þetta mál er bara í eðlilegum farvegi.- ktg