City hefur augastað á Cavani

Angelo Gregucci, aðstoðarþjálfari hjá Manchester City, segir að félagið hefði áhuga á sóknarmanninum Edinson Cavani hjá Napoli - ef hann væri til sölu.

Líklegt er að fleiri félög hefðu áhuga á kappanum sem hefur haldið tryggð við Napoli undanfarin ár, þrátt fyrir mikinn áhuga stórliða Evrópu.

Forráðamenn Napoli hafa hingað til ekki viljað selja en gætu freistast til þess ef háar fjárhæðir bjóðast og leikmaðurinn sjálfur óskar þess að fara.

„Ég veit ekki hvort að City ætlar að falast eftir Cavani en leikmaður eins og hann mun vekja athygli margra liða," sagði Gregucci.

„Roberto Mancini ákveður ásamt stjórnarmönnum hvaða leikmenn félagið vill bjóða í. Ég tel líklegt að Napoli muni leyfa Cavani að fara ef hann vill leita nýrra ævintýra."