Snæfell kærir þátttöku Butler

Snæfellingar hafa lagt fram formlega kæru til KKÍ vegna þátttöku Jaleesu Butler, leikmanns Vals, í leik Snæfells og Vals í úrvalsdeild kvenna í körfubolta í gær.

Valskonur tefldu fram Butler í gær en hún er nýgenginn í raðir liðsins. Snæfellingar telja að leikmaðurinn hafi ekki verið komin með leikheimild með liðinu og því sendu forráðamenn félagsins formlega kvörtun.

Friðrik Ingi Rúnarsson, framkvæmdastjóri KKÍ, staðfesti þetta í samtali við íþróttadeild Morgunblaðsins en leikmaðurinn var í raun ekki komin með leikheimild og því þátttaka hennar ólögleg.

Valur vann leikinn nokkuð sannfærandi 81-64 en líklega fá Snæfellingar sigurinn dæmdan sér í hag 20-0.

Þess má geta að í byrjun síðasta tímabils kærði Valur Snæfell við svipaðar aðstæður og var þeim dæmdur sigur eftir að aga-og úrskurðarnefnd KKÍ fór yfir málið.