Strákarnir í Ísafjarðarmálinu stíga fram: „Það snérist allt um helvítis DV og aumingja maðurinn“

Hilmar Örn Þorbjörnsson og Eiríkur Guðberg Stefánsson komu fram í Kastljósinu í kvöld og sögðu frá kynferðislegu ofbeldi sem þeir urðu fyrir af hendi Gísla Hjartarsonar þegar þeir voru á unglingsaldri. Gísli var kennari á Ísafirði en málið vakti mikla athygli þegar hann svipti sig lífi sama dag og DV fjallaði um brot hans árið 2006. Ritstjórar DV hættu störfum fyrir blaðið í kjölfarið en málið hefur oft verið kallað Ísafjarðarmálið.

Hilmar Örn og Eiríkur Guðberg stigu nú í fyrsta skiptið fram og sögðu frá því ofbeldi sem þeir urðu fyrir af hendi Gísla í mörg ár.

„Þetta byrjaði eftir 15 ára afmælisdaginn minn og gekk rétt yfir 17 ára aldurinn, nánast vikulega," sagði Eiríkur Guðberg. Gísli kynntist föðurfjölskyldu Eiríks Guðbergs og hjálpaði honum að læra eftir skóla. Þannig gekk það fyrir sér um nokkurra mánaðaskeið en svo byrjaði Gísli að brjóta á honum.

„Ég var í fótbolta og gekk rosalega vel í lífinu, en átti erfitt með skólann, var hálf-ofvirkur. En eftir að þetta byrjaði hætti ég í fótbolta og fór að drekka mikið, svo komu eiturlyf og sterar í kjölfarið af því," sagði Eiríkur Guðberg.

Rétt fyrir jólin árið 2005 ákváðu þeir að kæra Gísla fyrir brotin. Það var svo í byrjun janúar árið 2006 sem DV kemst á snoðir um kærurnar tvær.

„Hvernig, veit ég ekki, og það skiptir kannski ekki máli. En þeir hringja og hringja í mig og vilja fá hinar ýmsu upplýsingar en ég neitaði að tala við þá - slökkti bara á símanum mínum á tímabili. Þeir tala við pabba minn og hann biður þá ítrekað að bíða með þetta, og segir að um leið og þið birtið eitthvað um þetta þá er málið dautt - þið eyðileggið það fyrir okkur. En þeir hlustuðu ekki því miður," sagði Hilmar Örn.

Sama dag og blaðið kom út svipti Gísli sig lífi, og því fór málið aldrei neitt lengra í dómskerfinu. Eiríkur Guðberg og Hilmar Örn segja að þeir hafi gleymst í umræðunni.

„Við týndumst bara, það snérist allt um „helvítis DV og aumingja maðurinn"," sagði Hilmar Örn. „Ég gat ekki farið í mál við látinn einstakling og lokaði mig inni í tvær vikur, held ég hafi bara fengið vægt taugaáfall."

„Ég var svo ungur, ég var bara 18 ára. Ég var svolítið sár yfir því að það bjuggust allir við að við værum að ljúga, að hann væri hetja því DV skrifaði um hann. Hann gerði það sem hann gerði."

Eftir þetta hafa þeir fengið að heyra að þeir séu morðingjar, að það sé þeim að kenna að Gísli hafi svipt sig lífi. „Maður hefur heyrt bæði frá fólki sem trúir þessu, og trúir þessu ekki. Ég hef heyrt frá fólki sem segir að það hafi verið flott hjá okkur að kæra en ég hef líka heyrt að menn hafa kallað okkur morðingja fyrir að hafa drepið manninn," sagði Hilmar Örn.

Fyrir nokkrum árum reyndi Eiríkur sjálfsvíg eftir að maður kom til hans og sagði að hann ætti að gefa sig fram til lögreglu og sitja inni fyrir manndráp. „Ég fór bara heim. Ég gat ekki meira. Ég hengdi mig inni í þvottahúsi. Ég var nánast dáinn, það þurfti að blása mig og hnoða mig í gang - svo vaknaði ég upp á spítala," sagði Eiríkur. „Ég hef talað um þetta tvisvar áður, við lögregluna og sálfræðing."

Þeir segjast stíga fram núna til að fólk vakni. „Þetta er ekki okkur að kenna og fyrir okkur stráka er erfiðara að koma fram en fyrir stelpur. Það er hægt að mennta sig og ná bata," sagði Eiríkur.

Eiríkur Guðberg og Hilmar Örn fengu báðir greiddar hámarksbætur frá íslenska ríkinu vegna þeirra brota sem þeir urðu fyrir af hendi Gísla. Talið var sannað að Gísli hefði brotið gegn þeim.

Viðtalið má sjá hér.