SVFR eitt með tilboð í Norðurá

Aðeins tvö gild tilboð, bæði frá Stangveiðifélagi Reykjavíkur, bárust í Norðurá en opnað var fyrir tilboðin seinnipartinn í dag.

Á vef Vatna og veiði segir að hæsta tilboðið hafi verið frá SVFR ehf, sölufyrirtæki Stangaveiðifélagsins, en það var upp á rúmar 83 milljónir króna. Stangaveiðifélag Reykjavíkur var með tilboð upp á 76.500.000.

Þriðja tilboðið, sem Gestur Jónsson lögmaður ritaði undir fyrir umbjóðanda sinn, var óljóst frávikstilboð þar sem engar tölur komu fram "og fjallaði að mestu um að bæta ímynd árinnar, reisa ný og fleiri veiðihús, hámarka arðsemi landeiegnda og byggja upp lífríki og laxastofns árinnar" eins og segir á vef Vatna og veiði.

Stutt er síðan slitnaði upp úr viðræðum SVFR og Veiðifélags Norðurá, eins og fram kom á Veiðivísi. SVFR hafði haft ána á leigu í ein 66 ár þegar slitnaði upp úr viðræðum félaganna.

Veiðivísir sagði frá því í lok desember að erlendir aðilar hefðu sýnt Norðurá áhuga og þá var haft eftir Birnu Konráðsdóttur, formanni Veiðifélags Norðurár, að fjögur tilboð hefðu þegar borist í ána. Það er misskilningur því ekki höfðu borist fjögur tilboð heldur höfðu fjórir aðilar fengið útboðsgögnin.

Veiðifélag Norðurá mun nú fara yfir tilboðin.