Íslenskur ljósmyndari myndar götutískuna í London

Íris Björk fluttist til London í september 2011 og hóf nám í tískuljósmyndun og stíliseringu við London Collage of Fashion. Þar hefur hún í nógu að snúast og var meðal annars fengin til að mynda götutískuna á tískuvikunni í London fyrir stóra vefsíðu. Við hjá Lífinu heilluðumst af ljósmyndum Írisar og heyrðum í henni hljóðið.

Hvenær kviknaði áhugi þinn á ljósmyndun? „Ég gekk í Versló en þegar ég var 17 ára tók ég mér árs frí og fór ég sem skiptinemi til Brasilíu þar sem ljósmyndaáhuginn kviknaði fyrst. Svo þegar ég kom til baka fór ég að taka mikið af myndum fyrir nemendafélagið og áhuginn varð enn meiri. Eftir að ég útskrifaðist árið 2010 lærði ég svo förðun til að bæta við mig þekkingu sem gæti nýst mér í ljósmynduninni."

Hver eru þín helstu verkefni til þessa? „Það er alltaf eitthvað skemmtilegt í gangi. Ég tók myndir af götutískunni á London Fashion Week fyrir Coathanger sem sér um persónulega stíliseringu í Westfields verslunarmiðstöðunum í Bretlandi. Undanfarið hef ég verið að vinna að myndatökum með stílista frá New York ásamt því að er ég er að bíða eftir að nokkrarmyndatökur verði birtar í tímaritum. Svo var ég var að taka upp mitt fyrsta tískuvideo um daginn og hafði mjög gaman að því."

Þú hefur mikinn áhuga á tísku, hver eru þín uppáhalds tískutrend fyrir sumarið? „Að vera í hvítu frá toppi til táar, 60s áhrifin og Bomber jakkarnir."

Áttu þér uppáhalds fatahönnuð? „Já, meðal annars eru Dolce and Gabbana, Alexander McQueen, Elie Saab, Meadham Kirchhoff, Jeremy Scott, Milla Snorrason, Kalda, Kron by KronKron, Hildur Yeoman og Jör by Guðmundur Jörundsson í uppáhaldi."

Íris heldur úti bloggsíðunni Curious þar sem hún segir frá ævintýrum sínum í London.

Irisbjork.com