Sjóbirtingskvöld og opið hús hjá SVFR

Það er nóg um að vera hjá Stangveiðifélagi Reykjavíkur um þessar mundir enda veiðitimabilið nýhafið.

Fræðslukvöld helgað sjóbirtingnum verður haldið í húsakynnum félagsins við Rafstöðvarveg í kvöld og verður sérstaklega horft til veiðisvæðanna í Tungufljóti og Varmá/Þorleifslæk. Húsið opnar klukkan 19.30, að því er segir á vef SVFR.

Á föstudaginn kemur verður Bjarni Höskulds, slökkviliðsstjóri í Þingeyjarsveit, á opnu húsi SVFR. Bjarni er staðarhaldari á urriðasvæðunum norðan heiða í Laxárdal og Mývatnssveit og ætlar hann að gera svæðin að umfjöllunarefni sínu. Hrafn Ágústsson verður Bjarna innan handar en hann er "ástríðu þurrfluguveiðimaður og hefur stundað urriðaveiði frá unga aldri," að því er segir á vef SVFR.

Þá mun Hilmar Hansson nýjustu vörurnar í Veiðiflugum ásamt því að segja frá sínum uppáhalds veiðistöðum. Veiðiflugur munu sjá um vinninga í Happahylnum.

Opna húsið verður haldið í sal Lögreglufélagsins, Brautarholti 30, og opnar húsið kl. 20.00.