"Ég átti að vera í flug­vélinni sem fórst"

Heiðar Austmann útvarpsmaður FM 957 prýðir forsíðu Vikunnar. Þar rifjar hann upp árið 2000 sem hann fór á Þjóðhátíð með vinum sínum en þeirra á meðal var besti vinur hans, Gunnar Viðar Árnason, sem var farþegi í flugvélinni sem hrapaði í sjóinn í Skerjafirði. 

Helgin var hin skemmtilegasta og áður en þeir vissu af var komið að brottfarardegi.

„Ég hringdi í hann þegar við áttum að fara að koma okkur á flugvöllinn og sagði honum að drífa sig svo hann myndi ekki missa af fluginu. Ég tékkaði mig inn í röðina og í því kom hann hlaupandi inn en var númer sjö í röðinni. Þar sem vélin tók aðeins sex farþega þurfti hann að fara með næstu ferð. Ég sagði honum að ég myndi bíða eftir honum á Selfossi og ég man hvað ég var hissa á viðbrögðum hans en hann tók utan um mig og sagði:

„Þakka þér fyrir allt sem þú hefur gert fyrir mig, þú ert búinn að reynast mér svo vel.“ Svo stóð hann fyrir utan flughúsið og veifaði mér bless og það var eins og hann, eða sálin hans, vissi hvað væri í vændum.

Eftir slysið lokaði Heiðar sig alveg af og svaraði ekki í símann. Margir héldu að hann hefði sjálfur verið í vélinni því hann hvarf svo skyndilega af sjónarsviðinu. Hann var að vinna á FM á þessum tíma en hunsaði vinnuna. Þáverandi yfirmaður útvarpsins, Jón Axel Ólafsson, hringdi í hann og sagði honum að koma aftur til starfa en Heiðar tók illa í það, sagðist vera hættur og skellti á hann. Hann sá ekki fram á að finna „hressa gæjann“ aftur. Jón Axel hringdi þá í móður hans og bað hana að koma því til skila að staða Heiðars myndi bíða hans þegar hann væri tilbúinn, hann fengi ekki að hætta.   

Lesa má viðtalið við Heiðar í heild sinni í Vikunni.