McCallum kýldi Pálínu

Keflavík tryggði sér í gærkvöldi Íslandsmeistaratitilinn í körfuknattleik kvenna með sigri á KR í fjórða leik liðanna í Vesturbænum.

Mikið gekk á í leik liðanna í gær. Guðrún Gróa Þorsteinsdóttir þurfti frá að hverfa í upphafi síðari hálfleiks þegar hún fékk olnbogaskot frá leikmanni Keflavíkur svo framtönn skemmdist. Fór Gróa beint til tannlæknis þar sem gert var að tannskemmd hennar.

Shannon McCallum, bandarískur leikmaður KR, missti auk þess stjórn á skapi sínu. McCallum var í strangri gæslu Pálínu Gunnlaugsdóttur leikmanns Keflavíkur. Fannst þeirri bandarísku Pálína fá að ganga fullvasklega fram við varnarleik sinn og fór svo að hún missti stjórn á skapi sínu.

Í myndbandi á vef Rúv má sjá þegar McCallum kýlir Pálínu í magann þegar KR-ingar taka innkast. Dómarar leiksins dæmdu óíþróttamannslega villu á McCallum. KR-ingar kvörtuðu sáran í úrslitakeppninni yfir að Keflvíkingar fengju að ganga of hart fram.