Ólafur Páll: Við skiljum þetta einvígi eftir galopið

„Við lögðum upp með það að spila sterkan varnarleik og það gekk að mestu leyti allt saman upp,“ sagði Ólafur Páll Snorrason eftir tapið gegn Austria Vín í samtalið við Vísi rétt eftir leikinn.

Austria Vín vann leikinn í kvöld 1-0 og fara með eina marks forskot út í síðari leikinn sem fram fer á Kaplakrikavelli á miðvikudaginn eftir viku klukkan 16:00.

„Fyrirfram hefðum við líklega tekið því að tapa með einu markið og því erum við bara svona þokkalega sáttir með úrslitin.“

Atli Guðnason, leikmaður FH, fékk frábært færi rétt á fjórðu mínútu leiksins en markvörður Austria Vín varði skot hans vel.

„Ef við hefðum náð inn markið í byrjun leiksins þá hefði það haft mikil áhrif á spilamennsku Austria Vín og leikurinn hefði orðið mun opnari.“

„Við skiljum þennan leik eftir þannig að við eigum góða möguleika á heimavelli. Það er einhver styrkleikamunur á þessum liðum og rosalega umgjörð í kringum þetta Austria Vín lið, en það er samt sem áður allt hægt í fótbolta og við mætum klárir í Krikann.“

„Tímabilið er rétt hafið hjá Austria Vín og það er eitthvað sem við verðum að nýta okkur. Við erum komnir af stað fyrir löngu það gæti hjálpað okkur í síðari leiknum. Við þurfum bara fullan Kaplakrika, góðan stuðning og þá er allt hægt."