Opið hús Útvarpsleikhússins í 3. sæti á PRIX EUROPA

Upptaka Útvarpsleikhússins/RÚV á útvarpsleikritinu OPIÐ HÚS hlaut þriðju verðlaun sem besta útvarpsleikrit Evrópu í ár á verðlaunahátíðinni PRIX EUROPA sem nú er nýlokið.

Verðlaunahátíðin er haldin árlega í Berlín.

Þar er stefnt saman til keppni besta efni ljósvakamiðla Evrópu. 199 titlar ýmiss ljósvakaefnis, úr útvarpi, sjónvarpi og netmiðlum frá 36 löndum, voru valdir til þáttöku í ár.

Höfundur verskins er Hrafnhildur Hagalín og með leikstjórn fer Kristín Eysteinsdóttir.

Með hlutverk fara Kristbjörg Kjeld, Erlingur Gíslason, Unnur Ösp Stefánsdóttir, Bergur Þór Ingólfsson, Björn Thors og Ellert A. Ingimundarson.

Verkið segir frá er leiðir fimm persóna liggja saman á opnu húsi úti í bæ.  Þær grandskoða húsið með tilliti til ólíkra drauma, væntinga og langana, en brátt fer fortíðin að gera vart við sig. Óhugnanlegur atburður í sögu hússins gæti varpað ljósi á tengsl milli persónanna: Hver eru þau, á hvaða tímaskeiði eru persónurnar í sínu lífi, hvaða leyndarmál geymir þetta „ókunnuga" hús?

Þetta er í annað sinn á stuttum tíma sem Útvarpsleikhúsið hreppir 3. sætið í þessari sterku keppni. OPIÐ HÚS hefur nú náð sama árangri og upptaka Útvarpsleikhúsinu á DJÚPINU gerði 2011, það er að vinna þrenn verðlaun sama árið: Grímuna, Norrænu útvarpsleikhúsverðlaunin og ná 3. sæti á Prix Europa.