Rakspíri úr íslenskum jurtum

"Það er mjög fín lína á milli þess að gera snafsa og gera ilmvatn," segir Snorri Jónsson hjá Reykjavík Distillery. Fyrirtækið setti nýverið á markað rakspíra unninn úr íslenskum jurtum.

Rakspírinn ber nafnið Landi og kom fyrst á markað í Leifsstöð í haust. Nú má finna ilminn í Herrafataverslun Kormáks og Skjaldar og Kraumi og hefur honum verið vel tekið. Ilmvatnsgerðin er hliðarverkefni Snorra og Reyjavik Distillery sem hingað til hefur einbeitt sér að framleiðslu líkjöra og eimaðra snafsa úr íslensku hráefni. "Rakspírinn byggir á sömu hugmyndafræði á líkjörarnir okkar. Hann er unninn úr íslenskum jurtum á borð við kúmen, einiber, fjallagrös, bláber, rabarbara, sóley, trékvoðu og blóðberg. Við vildum vera trú upprunanum og notum raunverulegar ilmolíur, sem er orðið sjaldgæft nú til dags þar sem framleiðendur freistast til að nota gerviilm í ábataskyni," segir Snorri, sem fékk til liðs við sig frægan ilmhönnuð í verkið. "Fyrst ætluðum við að gera þetta allt sjálf en komumst að því að það eru djúp fræði á bak við ilmvatnsframleiðslu sem er ekki á allra færi. Þess vegna fengum við til liðs við okkur algeran gúru í þessum geira sem meðal annars sá um að hanna brúðkaupsilm í konunglega breska brúðkaupinu hjá Katrínu og Vilhjálmi."

Nafn rakspírans, Landi, vekur athygli og segir Snorri að þeim hafi þótt nafnið þjóðlegt og flott með skemmtilega tengingu. "Nafnið er með gamansömum tóni og vísar í líkindin á milli áfengis og ilmvatns. Heimagerður Landi er, að okkar mati, líkur rakspíranum á þann hátt að báðir eru síður ákjósanlegir til drykkjar." Á næstunni er áætlað að rakspírinn Landi fáist á nokkrum fleiri stöðum á landinu og fari jafnvel í sölu erlendis í framtíðinni.